بسم الله الرحمن الرحيم
انه فى يوم الثلاثاء 20/11/2007
تم الإتفاق على عمل إنتاج مشترك بين كل من
شقيان / الشاعر محمد فتحى السيد ( أكشن )
وتعبانه / الشاعرة أسماء محمود ( الأسكندرية )

______________________
وكانت البداية هى
يوميات ( شقيان وتعبانه )
وهى حوارات بالأشعار العامية المصرية
تتعرض للخلافات الزوجية
والمشاكل الاقتصادية والسياسية
من خلال الصور الكوميدية والدرامية
فهيا بنا لنرى يوميات
( شقيان وتعبانه )
___________________

1/ شقيان * محمد فتحى
*******************
اه يانا يابوى اه يانا
شقيان ومراتى تعبانه
واقف ع الباب من ساعه
وهيه نايمه ونعسانه
ياوليه هقع من طولى
وهايشمت فيا عزولى
اصرخ وااقول تعالولى
وازعق واعمل غاره
وألم عليكى الحاره
______________
2/ تعبانه * اسماء محمود
*********************
اعتقنى دانا طهقانه
ماقدرش ياشيخ تعبانه
العين ماتبوح بأمانه
اكمنى كمان بردانه
قول برضك مدى وهاتى
ماقدرش ابدا ياخواتى
ماحملش الهم ليلاتى
اسكت هـا نده لحماتى
_______________
3/ شقيان * محمد فتحى
********************
ياوليه افتحى ياعويله
وبلاش هيصه وهوليله
على ايه تندهى لحماتك
وتلمى علينا العيله
تيجى اخواتى واخواتك
ويضيعوا منى الليله
شقيان ودماغى وجعانى
رجليا يادوب شايلانى
ليلتك سوده يابعيده
نفسى أهفك بحديده
وأشوفلى عروسه جديده
______________
4/ تعبانه * اسماء محمود
*********************
ماهو فعلك بيجننى
والله انت مبهدلنى
وكمان ايه قصدك منى
متذنب طب ايه يعنى
ياسلام لو تبعد عنى
ادخل حتى الصبحيه
خدلك واحده افرنجيه
هات لك واحده لومنجيه
ياما قولت لى هاتورينى
امسك فلكه وقرينى
ليه كنت ياخويا شارينى
اوعك بس تعرينى
______________
5/ شقيان * محمد فتحى
**********************
ياحبيبتى افتحى من فضلك
انا برضه حبيبك راجلك
ما تخفى شويه فى صدك
واتحركى حبه برجلك
من زهقى بزعق ليكى
ولامره صعبت عليكى
هو انتى مشاعرك تاهت
ولا قلبك فى ايديكى ؟
الرقه بتاعتك فين ؟
وكلام العين للعين
نفسى اتهنالى يومين
دالعمر ماهوش عمرين
والفرح مساحته قليله
افتحى لكبير العيله
خليكى وليه اصيله
وبلاش خناقات الليله
______________
6/ تعبانه * اسماء محمود
*********************
ليلة ماتنوى السهر فى الفجر تدخل لى
ويم ماتيجى العشاء فى البيت ترخم لى
وان قلت لك قوم تربس تغجر لى
هو انت كده دايما بتظلمنى
ولك كلام لما تدلع بيألمنى
وبتهيص على كيفك وحاكمنى
خايفه اهاودك واقوم افتحلك الترباس
لتفتح الشيش وتفرج علينا الناس
وانا اللى ايدى ورجلى حقها تنباس
_____________________
7/ شقيان * محمد فتحى
**********************
ان كان على البوس هانبوس
وكمان راح تخدى فلوس
كان حلم جميل فى دماغى
خليتى الحلم كابوس
طهقان شقيان طول يومى
احزانى كتير وهمومى
فيها ايه لو بس تقومى ؟
قربت اشق هدومى !!
_________________
8/ تعبانه * اسماء محمود
*********************
مالك راجع حزين من شغلك
ماشى على العكاز ورابط رجلك
وشايك تحت باطك عيشك وفجلك
يارب تلطف بالغلابه وبيا
على البيت داخل وانا محتاسه
والارض بتشغى طبيخ وكناسه
خطى على الكانون والبرمتين والطاسه
وقال مساء الخير العشا يا وليه
وف لحظه كلمه هايفه اتحمق يلا نقوم
سب ودب ودار العراك بالشوم
وانا ليا فرقه تعرف تقوم بهجوم
من غير ماتعرف مين ظالم ومين مظلوم
تبقى الشراره حريقه والسحابه حسوم
لاحياتنا تنفع ولاعيليتنا صفاها يدوم
ومنين نشوف العدل ولا السفينه تعوم
مادام فوق قلب بعض قاعدين كده خصوم
تضحك علينا الحدادى فى السما والبوم
________________________

يتبع لليوميات بقية